Jarðhitasv. n. Mývatns - Þeistareykjasvæðið
Þeistareykir eru eyðibýli og alræmt draugabæli norðan undir Bæjarfelli, nær miðja vegu milli Mývatnssveitar og Kelduhverfis, en austur frá Reykjahverfi. Þar á milli er fjallgarður mikill, brattur og nokkuð hár, sem almennt er kallaður Lambafjöll. Milli þeirra og Bæjarfells er svo sprungufylkið mikla, sem fyrr var getið. Jarðhiti er í rótum Bæjarfells við Þeistareyki en hefur verið meiri og uppi í hlíðum fellsins í eina tíð, því að þar eru ljósleitar skriður, leir og ummyndanir. Regn og lækir hafa borið þessi efni ofan í fjallsrætur og út á hraunin, en þau þétta yfirborðið fljótlega á vatn. Hefur því myndast velgróinn jarðvegur þarna undir fjallinu. Austur og upp frá Þeistareykjum er hvirfill dyngjunnar Þeistareykjabungu, með gígpyttunum Stóra-Víti og Litla-Víti, hrikalegir nokkuð. Dyngjan er forn og jarðvegur víða á henni og öðrum eldri hraunum á þessum slóðum. Gróður er því talsverður á þeim, þó ekki sé hann allur hávaxinn, lynggróður mikill, víðir, grasmóar og snjódældalautir með ýmsum ilmjurtum.
Torfæruslóð liggur á Þeistareyki úr Mývatnssveit og áfram norður til Húsavíkur eða ofan í Kelduhverfi. Sæluhús er á staðnum, en langt er í næstu skála. Göngufólk mun vera fátt á þessum slóðum. Jarðhitinn virðist vera mestur umhverfis sýnilega jarðhitann, eins og oft er, og nokkuð efnilegur til vinnslu. Rafmagni yrði líklega veitt til Húsavíkur um Reykjaheiði, en gufuveita hefur einnig verið í umræðu. Hvort tveggja yrði nokkuð áberandi í landslagi, en mannvirki önnur, borholar, gufulagnir, stöðvarhús o.s.frv. myndi líklega bera í eða undir Bæjarfellið.
Freysteinn Sigurðsson
